台灣教會公報-小人物 ê 觀點
小人物 ê 觀點
作者：陳育萱 #台羅版 TL
「......按呢祈禱，攏是奉靠 主耶穌基督的聖名求。 阿Amen。 」
Ing-àm 欲睏進前，四歲半的囡仔向上帝求討，希望會當做哥哥，我對伊講：「囡仔是上帝的產業，願上帝加倍賜福予阮兜，予咱做伊的見證。你tiō愛平安、gâu大漢知無？」講到遮，雄雄想起早tiō kè-óng的阿媽，伊中風了後，逐擺看tio阮，上捷講的話tiō是「平安，gâu大漢，gâu讀冊」，原來阿媽的話，從來毋捌離開我，想到遮目屎tsua̋nn流lua̋i。
自細漢gún阿母tiō𤆬我去主日學，彼陣講Tâi-gú的人閣足濟，彼時拄好攏無年歲較倚的囡仔伴，感覺教會生活足無趣味--eh！背Tâi-gú金句閣較毋知佇咧背啥物，到ta̋nn攏袂kì-eh半句，實在足無聊--ê，閣較大漢--ê，藉口愛寫功課，tsū-án-ne 離開教會幾若年；直到拄著人生風浪，受主內兄姊關心幫贊，真正感受著主的愛，才決志受洗禮，彼陣長老教會已經有Tâi-gú使用人口減少，少年人減少的狀況，一寡教會開始舉行台、華語兩場禮拜，我ka-tī嘛是因為有華語禮拜才有機會閣轉來。
閣過了十年，為著陪囡仔揣適合的主日學，來到這馬聚會的教會，是青年願意服侍，真正感動人的教會。想講囡仔會當踮教會學淡薄仔Tâi-gú，路尾發覺kan-ta靠教會，向望囡仔會通講Tâi-gú，根本有困難；Tâi-gú文化傳承佇咧教會內外攏有真大的uî-kì，當我看著主日學運動會差不多元完全華語化，實在會當理解，嘛感受Tâi-gú雄雄欲無去的震憾，學校佮厝內攏無佇咧講，教會無通好聽，若是按呢，Tâi-gú敢閣佇咧？
信耶穌敢一定愛講Tâi-gú？無講Tâi-gú敢是無正統？若準超過八成的人攏kan-ta會曉講華語，那按呢，咱新一代台灣囡仔的母語到底是啥物？母語傳教到ta̋nn到底是宣教的絆跤石ah是幫贊？百年前傳教師來到台灣，隨用彼時的主要語言來傳教，後來，無論台語、客語、族語攏落足多心血，Tâi-gú的困境嘛是所有本土語言拄著的問題。
我認為照目前狀況，kan-ta向學校或教會傳承本土語言是較困難，應該對家庭出發，一跤一跡建立本土語言的情感連結；教會的方面，應該重視本土文化佮本土語言的價值，佇咧向華語轉型的中間，毋通hőng感覺本土語言tiō是老硞硞，鼓勵培養少年老師佮青年人本土語言信仰的造就；講的輾轉的序大，應該較捷對囡仔講出喙，真正有人咧用的語言才有活路，若無咱的本土語言佮一个一个序大鬥陣落土，嘛是早慢的代誌。長老教會無一定愛佮復興本土語言牽做伙，咱佇咧堅持的，是語言背後的文化意涵佮歷史記憶，向望Tâi-gú ā-hó, Kheh-gú ā-hó,Tso̍k-gú ā-hó, 咱的台灣囡仔會當有機會佇咧教會接觸著，會記得ka-tî是啥物人，會當用信仰的角度，來了解咱共同徛起的島嶼。
向望五十年後，iá-koh會當聽著蓁濟人按呢祈禱講：「......按呢祈禱，攏是奉靠 主耶穌基督的聖名求 。 阿Amen。 」
＃白話字原文刊載於台灣教會公報 2022年1月3日~1月9日/3645期
小人物 ê 觀點-白話字POJ
Chok-chiá: 陳育萱
「......Án-ni祈禱，lóng是奉靠主耶穌基督ê聖名求。A-men。」
Eng-àm 欲睏進前，四歲半 ê 囝向上帝求討，希望 ē-tàng 做哥哥。我對伊講：「囡仔是上帝ê產業，願上帝加倍賜福 hō͘ 咱，hō͘ 咱成做伊ê見證。你 to̍h 愛平安、 gâu大漢，知無？」講到遮，我 hiông-hiông 想 tio̍h 早 tō 過往 ê 阿媽。阿媽中風了後，逐擺看 tio̍h 阮，上捷講ê話tō是「平安，gâu 大漢，gâu 讀冊。」我想 tio̍h 阿媽 ê 話毋捌離開我，我 ê 目屎 chŏaⁿ 流 loài。
自細漢，gún 阿母 to̍h chhōa 我去主日學。彼陣，講台語 ê 人 koh 足濟，總是因為 lóng 無年歲較倚 ê 囡仔伴，我 tō 感覺教會生活足無趣味！背台語金句 koh khah 毋知是leh背啥物，到今 lóng 袂記得半句，實在足無聊。Khah 大漢了後，我藉口寫功課無閒，自án-ni 離開教會幾若年；直到拄 tio̍h 人生風湧，我受主內兄姊關心幫贊，真正感受 tio̍h 主 ê 疼才決志受洗禮。Tī 彼陣，長老教會已經有台語使用人口減少、少年人減少 ê 狀況，有一寡教會開始舉行台語、華語二場禮拜，我 ka-tī mā 是因為有華語禮拜才有機會 koh 轉來。
Koh 過了十年，為 tio̍h 陪囡仔揣適合 ê 主日學，來到 chit-má 聚會 ê 教會，這是青年願意服事，真正感動人ê教會。我原底想講囡仔 ē-tàng 踮教會學淡薄仔台語，路尾發見 kan-ta 靠教會，向望囡仔會曉講台語，根本有困難。台語文化傳承 tī 教會內外 lóng 有真大 ê 危機。主日學差不多完全華語化，我實在 ē-tàng 感受台語 kiōng-kiōng 欲無去 ê 震撼。學校 kap 厝內 lóng 無 leh 講，tī 教會 mā 無通聽，若 án-ni，台語 kám koh tī-leh？
信耶穌 kám 一定愛講台語？無講台語 kám 是無正統？若準超過八成 ê 人 lóng kan-ta 會曉講華語，án-ni，咱新一代台灣囡仔 ê 母語到底是啥物？母語傳教到今是宣教 ê 絆跤石 á-sī 幫贊？百外年前基督教宣教師來到台灣，用彼時 ê 主要語言台語來宣教，後來，無論客語、逐種原住民族語， 教會 lóng 用足濟工夫 kap 血汗。台語 ê 困境是所有本土語言拄 tio̍h ê 問題。
我認為照目前狀況，kan-ta 寄望學校 á-sī 教會傳承本土語言是 khah 困難。咱應該對家庭出發，一跤一跡建立本土語言 ê 情感連結；教會方面 tio̍h 重視本土文化 kap 本土語言 ê 價值，毋通 hŏng 感覺本土語言 tō 是老硞硞，tio̍h 鼓勵培養少年老師 kap 青年人本土語言ê信仰造就；講會輾轉ê序大tio̍h khah捷對囡仔講出喙，真正有人用 ê 語言才有活路。若無，咱 ê 本土語言 kap 一个一个序大鬥陣落土，是早慢 ê 代誌。長老教會 tio̍h 堅持 ê，是語言背後ê文化意涵 kap 歷史記憶，咱向望無論台語、客語、族語，台灣囡仔 lóng 有機會 tī 教會接觸 ē 記得 ka-tī 是啥物人，ē-tàng 用信仰 ê 角度，來了解咱共同徛起 ê 島嶼。
向望50冬後，咱 koh ē-tàng聽著濟濟人祈禱講：「......Án-ni祈禱，lóng是奉靠主耶穌基督ê聖名求。A-men。」